नेपाली हास्यव्यङ्ग्य अनलाइन पत्रिका

यहाँ देशले चिन्छ भन्ने सुनिन्थ्यो
यहाँ मर्न गाह्रो भनेको सुनिन्थ्यो
यहाँ मिल्छ रे दिव्य संजीवनी नै
यहाँ दीर्घजीवी सुखी रे खुसी नै ।।

सधैँ चुस्त रे राज्य नेतृत्व पंक्ति
सधैँ व्यस्त रे राज्यको अग्रपंक्ति
सधैँ कामना स्वस्थ दीर्घायुको रे
सधैँ राज्य हाम्रो नयाँ ढंगको रे ।।

न वार्ता यहाँको कहिल्यै सकिन्छ
न सत्ता यहाँको कहिल्यै अडिन्छ
न आफैँ नयाँ देश हाम्रो बनिन्छ
न चिन्ता यहाँ देशको संलिइन्छ ।।

उहाँ पुग्नुभो रे नयाँ काम खोज्न
उहाँ पुग्नुभो रे नयाँ दाम रोज्न
उहाँ नै विदेशी नयाँ शक्ति बुझ्ने
उहाँ रे सबै देशको भक्ति गर्ने ।।

सुनेँ सत्य वाणी नयाँ देशभित्र
सुनेँ रोग बोकी विदेशी पवित्र
सुनेँ देशमा न्यायको वेद मन्त्र
सुनेँ भव्यता राष्ट्रको त्यो स्वतन्त्र ।।

अरू जे रहून् रोगको सान हुन्न
अरू जे भनून् भोगको ध्यान हुन्न
अरू जे गरून् मौनता भंग हुन्न
अरू जे रुचाऊन् सबै ढंग हुन्न ।।

सिटामोलको जिन्दगी बाँच्न पाऊँ
सिटामोलमा राष्ट्र आफ्नो चिनाऊँ
सिटामोलकै शक्ति हेर्दै रमाऊँ
सिटामोलमै जिन्दगी साट्न पाऊँ ।।
काठमाडौं