नेपाली हास्यव्यङ्ग्य अनलाइन पत्रिका

साथीहरूसँग बसेको बेला
घाँटीबाट सोमरस पसेको बेला
त्यसै त्यसै देशको माया उम्लेर आउने किन होला ?
सबै जाँडका घ्याम्पाहरू, देश गनाउने किन होला ?

जति जति सोमरस चढ्न थाल्यो
उति उति नेताका सहस्रनाम पाठ बढ्न थाल्यो
जिब्रो पनि अगाडिको सितन भन्दा
पछाडिको नेताको सरापतिर पो बढ्न थाल्यो ।

नेतालाई सराप्न तँछाड मछाड चल्यो
सराप कम्पिटिसनमा नेता सराप्न उसले उसलाई उछिन्यो
जिब्रो जति लर्बराओस् तर
“त्यो साले गधा कुक्कुर नेता”– यत्ति पाठ त प्रष्टै गर्यो ।

टुप्लुक्क त्यही बेला त्यही सरापिएको नेता आई पुग्नुभयो
सिङ्गै चार बोतलको रक्सीले पनि चट्टक्कै छोडेर गयो
अघिसम्म जसको सत्तो सराप चल्दै थियो
त्यसलाई धनुष्टङ्कार नमस्कार गर्न तँछाड मछाड पो भयो ।

सबैका हात त्यसै नेतालाई मालिस गरुँला झैँ गर्न थाले
नेताले त्यहीँ आउँ झारे पहिले मैं चाटुला झैँ गर्न थाले
सपैका ढाड त्यसै त्यसै दोब्रिएर नेताको घुँडा ताक्न थाले
जिब्रो भोको कुकुरको जस्तो झुन्डिएर र्याल काढ्न थाले ।

के चित्त बुझेन र नेता स्वाट्ट बाहिरिनु भयो
नेताबाट अस्वीकृत सबै फेरि आफ्नो आसनमा थेचारिनु भयो
“देश लुट्ने ज्यानमारा यही त हो नि’ ! एउटाले प्याच्च भन्यो र घुट्क्यायो
“देश यसैले खत्तम पार्या हो” भन्दै अर्कोले मुट्ठी उज्यायो र गिलास रित्यायो ।

साथीहरूसँग यसरी बसेको बेला
घाँटीबाट सोमरस त्यसरी पसेको बेला
त्यसै त्यसै देशको माया उम्लेर आउने किन होला ?
सबै जाँडका घ्याम्पाहरू देश गनाउने किन होला ?
काठमाडौं