नेपाली हास्यव्यङ्ग्य अनलाइन पत्रिका

हजुर आमाले नजन्माएको सन्तान
मेरो घरमा छोरो जन्म्यो
बाजागाजा बज्दैछन्
नाचगान चल्दैछ
वातावरण रंगीन रंगीन छ
तर छिमेकीलाई निकै चिन्ता बढेको छ,
मेरी हजुर आमा पहिलो पटक
गर्भवती भएर पनि सुत्केरी भईनन्
छिमेकीले जाँतो बोकाई दिएछ
हजुर आमा सुत्केरी हुँदा,
दोस्रोपटक
आमाले प्रयास गर्दा
छिमेकीले आमालाई
बेस्सरी मह खान दिएछन्,
आमाले सन्तान त दिइन्
तर
म सपाङ्ग हुन सकिन,
म जन्मदा राम्रै जन्मिएको थिएँ
धेरै राम्रो भएर पनि होला !
कसैले मेरा हात तान्न लागे
कसैले मेरो गाला चिमोट्न लागे
जिस्किंदा जिस्किंदै
कसैले गाला पड्काउन लागे
कसैले गर्दन त
कसैले अण्डकोशमा हान्न लागे,
सग्लो र अग्लो मान्छे म
हेर्दा हेर्दै
अपाङ्ग र होचो भएँ,
धेरै समयपछि
श्रीमती गर्भवती भईन्
पहिलो गर्भ तुहाईयो,
दोस्रो पटक गर्भाधान हुनै लाग्दा
चिकित्सकहरूको सल्लाह मिलेन
र तीन मध्येका दुई चिकित्सकको बलमा
बल्लबल्ल गर्भाधान गराइयो
म गर्वित भएँ,
झण्डैझण्डै सात दशकमा
मेरो घरमा सग्लो छोरो जन्म्यो,
मेरो एक छिमेकी दुखी छ
मेरो छोरोको अनुहार
कसैगरी ऊसँग मिल्दैन भनेर
छिमेकी चिन्तित छ
र
छिमेकीले आफ्नो मुहार
मेरो मुहारसँग मिलाउने प्रयास गर्दैछ ।