नेपाली हास्यव्यङ्ग्य अनलाइन पत्रिका

दुइटी महिलाहरू आ–आफ्ना दूधे नानीहरूलाई प्राकृतिक र सर्वोत्तम दूध चुसाउँदै बात मार्दै थिए । तिनका नानीहरू भने काखे र दूधे भए पनि बेला–बेलामा आमा समूहको कुरा सुन्नालाई दूध चुस्न छोडेर खेले जस्तो गर्थे । यसैलाई शिक्षकहरूले कक्षामा बालसुलभ चञ्चलता भनी उदाहरण दिन्छन् ।

एउटी आमाले आफ्नो दुःख पोखिन् के गर्नु कहिलेकाहिँ त मेरो नानीलाई के हुन्छ के हुन्छ । रातभरि सुत्दैन । रोएको छ, धुरुक्कै पार्छ । तिम्रोले नि दुःख दिन्छ कि दिँदैन ?

अर्कीले आफ्नो नानीलाई लाम्टा र झाम्टा दुवै सँगसँगै दिएर भनिन्, मेरो छोरोले त त्यसरी दुःख दिन जानेकै छैन । कहिलेकाहीँ त त्यस्तै हो । राति रुन थाल्यो भने लुटुक्क सुताउने नयाँ जुक्ति मैले गर्ने गरेकी छु । अनि खुरुक्क सुत्छ ।

‘लौ न मलाई त्यो सजिलो जुक्ति बताइ दिनुप¥यो । म त दिक्क भैसकें । रातभरि रोएर सुत्नै दिँदैन । बाबु चैं झन् दिक्क हुन्छन् । एकातिर छोरोले रोएर हैरान पार्छ अर्कोतिर सुत्न पाइँदैन भनेर बाबु भनौँदोको कचकच भिन्दै !’

क्यै गर्नु पर्दैन । सजिलो छ । म त छोरो रुन थाल्यो भने ‘माओवादीहरूले रोएको सुने भने मार्छन् ! सुत् बा ! सुत् !’ भन्छु । छोरो पनि त्यति सुन्नासाथ निदाउँछ । यो जुक्तिलाई रामवाण भन्ठाने हुन्छ, बैनी ! फरकै पर्दैन !

अर्की महिलाले पनि भारतले सफल अणुवम परीक्षण गरे झैँ उक्त सजिलो जुक्तिको सफल परीक्षण गरिछन् । महिलाको पतिले हलका विरोध जनाए, नानीलाई सानैदेखि यसरी डराउने बानी लाउनु हुन्न । उसको पनि बिहे भएपछि म जस्तै काँथर होला नि ! महिलाले जवाफ दिइन्, मैले आत्मरक्षाको लागि यो प्रयोग गरेकी हुँ ।

काठमाडौं