अब प्रतिपक्षमा व्यङ्ग्यकार
काङ्ग्रेस, एमाले, एमाओवादी एक्कै ठाउँ
प्रतिपक्ष खोज्न कतातिर जाऊँ ?
कतै नजाऊँ, यतातिर आऊँ
प्रतिपक्षको भूमिका व्यङ्ग्यकारको नाउँ ।
उनीहरू सत्ताधारी, हामी कलमधारी
उनका चिल्ला गाडी, हाम्रा छुस्स दाह्री
कुर्सीमा उनीहरू चारखुट्टे, हामी जहिले पनि दुइखुट्टे
उनीहरू हाम्रो नोट हेर्ने, हामीहरू उनीहरूको खोट हेर्ने ।
उनीहरू हाम्रा कुरालाई ध्यान पनि दिँदैनन्,
हामी उनीहरूलाई लाइन बसेर भोट दिन्छौं
हाम्रै मानो खाएर पनि उनीहरु हाम्रा कुरा गर्दैनन्
हामीहरू आफ्नो मानो खाएर उनीहरूका कुरा गर्छौं ।
देश उनीहरू पनि बनाउने, देश हामी पनि बनाउने
उनीहरू पढ्दा गन्हाउने, हामीहरू सुँघ्दा गनाउने
उनीहरूको सरकार चले चलोस्, नचले नचलोस्
तर हामी व्यङ्ग्यकार यो प्रतिपक्ष चलाउने, चलाउने ।
बत्तिसपुतली, काठमाडौं