नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
स्वयं लेखिएका दस्तावेज मुखले मेटेर मेटिन्छ र
अविश्वासले जमेको मन कुनै मदानीले फेटिन्छ र
सम्बन्ध सबै मुल्तवी राखी बाटो छेक्दैछ वर्तमान
रहरहरूको बैशाखी टेकेर गन्तव्य कहाँ भेटिन्छ र ।

२.
मान्छे जत्ति नै बैगुनी होस् अलिकति गुन निस्कन्छ
पिउनु हुँदैन समुद्रको पानी त्यसैबाट नुन निस्कन्छ
रेटिदा रेटिदै समाएको हुँ जिन्दगीको सुर ताल मैले
जसरी रेटेपछि सारङ्गीबाट पनि मीठो धुन निस्कन्छ ।

३.
मानका लागि नै किन नहोस् मान्यजनलाई सोध्नू
सोधेर घटिन्न वन पाखा र आफ्नै वतनलाई सोध्नू
मन हो सच्चा न्यायाधीश भन्दै बाबाले भन्नुहुन्थ्यो
निणर्य गर्नुपहिले एकपटक आफ्नै मनलाई सोध्नू ।

०००
भैरहवा