नेपाली हास्यव्यङ्ग्य अनलाइन पत्रिका

अमर सन्तति :

१.
रित्तो खोपडी उधिनेर हरपल खोतल्छु
मनभित्रका दुषित ती भाव ओकल्छु
आधा गाग्री पानीजस्तै यसो छचल्किई,
बाङ्गाटिङ्गा शब्दहरु लेखी टोपल्छु ।

२.
साक्षी किनाराका भएको छु इमान गुमाएर
साँच्चै कर्महारा भएको छु स्वाभिमान गुमाएर
अँधेरीमा बुई चढी उज्यालोमा चम्कियो अर्कै,
बिहानीको तारा झैँ भएको छु शान गुमाएर ।

३.
कालो मनभरी खुसियाली सजाउने धेरै हुन्छन्
आफ्नो काममा अरुलाई कजाउने धेरै हुन्छन्
यो स्वार्थी, इखालु, विखालु र मतलबी दुनियाँमा,
अरुको हारमा मनमनै ताली बजाउने धेरै हुन्छन् ।

०००
भक्तपुर