नेपाली हास्यव्यङ्ग्य अनलाइन पत्रिका

बुढ्यौलीले गाँज्दा पनि मन कतै छैन मेरो गिरेको
बनी लोभी पापी गुट र गठमा छैन काहीँ छिरेको
अझै मेची काली पल पल छ यो याद साह्रै कुदेको
छ मेरो छातीमा अधिक ममता देशको नै सुझेको ॥१

बुढाले नै राखे यस मुलुकको धर्म संस्कार थामी
बचाए जोगाए हर तरहले आस्मिता उच्च थामी
अनेकौँ हाँसेका पलसित हरे आँसुले छन् रुझेको
छ मेरो छातीमा अधिक ममता देशको नै सुझेको ॥२

बसेको चौतारी घर नजिकको खास मैले रचेको
चिनी ढुङ्गे गाह्रो बगर बिचको खेत गैह्री बचेको
यहाँ ढुङ्गो द्यौता कतिपय बने खास मैले पुजेको
छ मेरो छातीमा अधिक ममता देशको नै सुझेको ॥३

गढीगौँडा धाई शिखर बिचमा स्वणर्-किल्ला बनाई
गरी सारा वैरी क्षय विजयको याम ज्यादा मनाई
बचाएको पाटो बिच मनुजको देख्छु श्रद्धा कुँजेको
छ मेरो छातीमा अधिक ममता देशको नै सुझेको ॥४

सयौँ लोभी पापी अवनि बिचमा जन्मिए बारबार
जलाई त्यस्ताको सकल अभिधा चूर्ण पार्दै अँगार
बनी ज्ञानी ध्यानी बहुत बलले तत्व भित्री बुझेको
छ मेरो छातीमा अधिक ममता देशको नै सुझेको ॥५

फिका भो नेपाली पन मनुजको आँतमा वीरताको
निशानी मेटेझैँ महशुष भयो पौरखी त्यो कथाको
यहाँका अन्यायी उपर अहिले खै युवाले जुधेको ?
छ मेरो छातीमा अधिक ममता देशको नै सुझेको ॥६

०००
भक्तपुर