नेपाली हास्यव्यङ्ग्य अनलाइन पत्रिका

विद्या अनामिका तिवारी :

दुर्भेद्य दुर्ग जसरी दिनरात डट्ने
सन्तान खातिर सदा खलसाथ लड्ने
हुन् लौह पौरुष यिनै गृहका खजाना
यी ज्येष्ठ नागरिकमा छ सदा प्रणाम
।।१।।

संज्ञानका जनक यी नित मुस्कुराई
दिन्छन् सदैव सुविचार समाजलाई
हुन् यी सुमेरु जन चेतनका मुहान
यी ज्येष्ठ नागरिकमा छ सदा प्रणाम
।।२।।

मात्सर्यका कलुषका सब छिद्र टाली
सद्भावको चहकिलो नवदीप बाली
दिन्छन् अलौकिक र निर्मल दिव्य ज्ञान
यी ज्येष्ठ नागरिकमा छ सदा प्रणाम
।।३।।

रित्तो बनेर मनचित्त सबै उघारी
को हुन्छ प्रेम अविराम दिने नथाकी
होला र को जन पिता जननीसमान
यी ज्येष्ठ नागरिकमा छ सदा प्रणाम
।।४।।

राखे सदैव करुणा समता सबैमा
स्वार्थी बनेन ममता कहिल्यै कसैमा
यस्ता अमूल्य निधिको गर नित्य मान
यी ज्येष्ठ नागरिकमा छ सदा प्रणाम
।।५।।

सत्पात्र यी स्वजन आश्रममा नजाउन्
सन्तानसाथ सुखले घरमै रमाउन्
यी पूज्य श्रेष्ठजनका पदमै छ धाम
यी ज्येष्ठ नागरिकमा छ सदा प्रणाम
।।६।।

०००
भक्तपुर