नेपाली हास्यव्यङ्ग्य अनलाइन पत्रिका

सुमी लोहनी :

मित्र ! तपैँलाई विशेष गरेर काठमाडौँ खाल्डामा मात्र सिमित रुपमा मनाइने ‘गाईजात्रा’ कस्तो लाग्छ कुन्नि ? अब बडो भव्यताका साथ सभ्यता लापता भ’को नयाँ नेपालामा दिनहुँ मनाइने कस्ता-कस्ता गज्जबका जात्रा, महाजात्रा देख्ने, सुन्ने, भोग्ने, हामी जस्ता सौभाग्यशाली निरिह सर्वसाधारण मान्छेका लागि सयौँ वर्ष पुरानो मोडेलको ‘गाईजात्रा’ के रमाइलो होला र भन्या ! फेरि प्राणीमध्येमा पनि सबैभन्दा सोझो, सुधो चारखुट्टे गौमाताको जात्रामा के मजा होला र दुईखट्टे चतुर महान् प्राणीको जात्रामा जस्तो भन्ने लाग्दैन र तपैँलाई ? झन त्यसमाथि हिजोआज त बडो द्रूत गतिमा नेपाली आँगनमा सबैभन्दा हट, हिट जात्रा ‘मै मात्र ठिक…’ जात्रा पो मञ्चन भै राखेको छ क्यारे ! हैन र ?

आहा ! यता जात्रा, उता जात्रा, जता हेर्‍यो उतै जात्रै जात्रा । यस्तो जात्रामय माहोलमा जति ठूला र शक्तिशाली जीव भए उति नै रोचक जात्रा देखाउन माहिर छन् । झनै रमाइलो त के भने वनको राजाको दरबारमा पसेपछि आफैँ सिंह हँु झैँ गर्जिन्छन् । अनि बालुवाको टारै टार ‘म्युजिकल चियर’ खेल्दै अधोवस्त्र फुस्केको पत्तै नपाई बेतोडसँग दौडिन्छन् । तर यिनै ‘मै हुँ’ भन्ने वीरबहादुरहरू प्रभुको दैलोमा ‘आशीर्वाद देहिम् ममः’ भन्न जाँदा चैँ रुझेको बिरालो झैँ लुत्रुक्क परेर जान्छन् । अनि ‘खाई सार न लाई सार बाँचुन्जेल सधैँ कुर्सी मै बसिरहने छ विचार ।

त्यसैले परेँ लौ म त ‘प्रभु’ को पाउमा लम्पसार । अब खुस भै ख्वामितले बक्सियोस् झोलीमा अभय वरदान’ भन्दै बडो दयनीय अवस्थामा आफू भएको दीन अनुहार पारेर दर्शाउछन् । फेरि यिनै प्रभुकै नुन खा’का कुखुराजस्ता ठूला-बडा भनाउँदाहरू आफ्नो कुर्सीमा पुगेपछि गौ माताको मैमत्त भएको पति झैँ डुक्रिन्छन् र मदारीको इसारामा कठपुतली नाचे झैँ छमछम छमाछम गर्दै नयाँ-नयाँ महाजात्रा देखाउछन् । ‘वाँ’जीहरूका ‘आसेपासे’हरू चैं ‘वाँ’ हजुरकै लोलीमा बटरमा चोपेको बोली मिलाउँदै ‘चापुलुसी राग’ अलाप्छन् ।

अब तपैँ नै भन्नुस् त मित्र ! अन्तर्राष्ट्रिय स्तरमा मञ्चन र प्रदर्शन हुने यस्ता रमाइला-रमाइला महाजात्राका मौन रमिते बन्ने बानी बसेका बिचरा ! हाम्रा लागि गौमाताको जात्रा लोड सेडिङ्ग हुँदाको दिपावली जस्तै झिलिमिली अथवा प्रभुकै देशबाट आयातित नुन नहालेको तिहुँन जस्तो नहोला र भन्या ?

जे होस्, खुइलेर गएका उहिलेका दिनदेखि वर्तमान परिप्रेक्षसम्म कहिल्यै पुरानो नभएको सधैँको नयाँ र ताजा यस्तो रमाइलो ‘स्वामी सेवक जात्रा’ का दर्शक बन्न पाउने भाग्य पुर्पुरामा पर्मानेन्ट मसीले कसी लाउनै नपर्ने गरेर लेखाएर जन्मेका हामी चैँ साँच्चैका सारै नै भाग्यमानी पो रहेछौँ क्यारे ! कि कसो हो ?

यसरी हामीलाई सुख, खुसी, आनन्द, मनोरञ्जन आदि दिनका लागि कहिल्यै नथाकी स्वस्फुर्त रुपमा निरन्तर महाजात्रा देखाउने सबै महान्, नाइके, टाउकेहरूलाई धन्यवाद नदिए त फेरि कृतघ्न भइएला त्यसैले टाउके, लाउके, नाइके, वाम, हाम, जाम, खाम, आदि सबैलाई धन्यवाद !

आउनुस् यस्तो रमाइलो जात्रा हेरौँ, रमाऔँ र भनौँ- जय ख्वामितको खुट्टामा लम्पसार महाजात्रा !

०००
भाटभटेनी, काठमाडौं