कस्तो दुर्भाग्य !
चुकेका अगुवा नेता बिकेको पत्रकारिता....
बिरामी, औषधी, मृत्यु शोकका समवेदना
सन्तोष पाइने हुन्नन् जानकारी र सूचना
धनीले धनले गर्छन् कालोमैलो सबै सफा
निर्धाका निम्ति मात्रै हुन् ऐन कानुनका दफा
सत्तासीन कतै भू.पू.लाग्छन् सर्वज्ञतुल्य झन्
न्यायाधीश सबै नेता यहाँ को अनभिज्ञ छन्?
चुनावपूर्व देखिन्थे खेत, खर्क, खलातिर
पर्दा सङ्कट नेतामा सत्तारोहणको पिर
उद्दण्डता बढेको छ काम हुन्छन् विवादित
खटेका काममा छैनन् स्वास्थ्यकर्मी सुरक्षित
छ कुशासनको सास्ती भ्रष्टता खिन्नता भय
अझै मान्छेहरू व्यस्त गर्नमा तिनकै जय
भजाई जनता खाने, नगर्ने तिनकै भलो
गोरु चुट्ने हली-नेता अड्काई पहिले हलो
आम मान्छेहरूभन्दा देखिन्छन् विज्ञ नै बढी
जान्दैनन् हेर्न जो बाँध्छन् हातमा महँगो घडी
बडा पत्रहरू राखून् बनून् आचार-संहिता
चुकेका अगुवा नेता बिकेको पत्रकारिता
निराशा खिन्नता कुण्ठा रिक्तताबाट तप्त झन्
कस्तो दुर्भाग्य नेपाली जन्मिँदै अभिशप्त छन् ।