नेपाली हास्यव्यङ्ग्य अनलाइन पत्रिका

जसले जे भने पनि पत्याउने
खोक्रा भाषणमा ताली बजाउने
अरुका इसारामा नाच्ने
हामी कस्ता ?

अन्याय, अत्याचार सहने
भ्रष्टाचार, घुसखोरीमा आँखा चिम्लने
म किन पहिला बोलूँ भनी मौन रहने
हामी कस्ता ?

काला बजारियाले निल्न खोज्ने
पेट्रोल, डिजेल किन्न दिनरात लाम बस्ने
पैसा तिर्दा पनि सामान किन्न नपाउने
हामी कस्ता ?

सधैँ अभाव र हाहाकार झेल्ने
रित्ता गाग्री, बाल्टी बोक्दै हिँड्ने
अन्धकारमा रुमल्लिइरहने
हामी कस्ता ?

अकासिँदो महङ्गीको मारले त्रस्त
रोग, शोक, भोकले ग्रस्त
काल, कुर्सीको खेलले परास्त
हामी कस्ता ?

समानताको वकालत गर्ने
छोरीचेली एक्लै हिँड्न डराउनु पर्ने
असहाय वृद्धलाई बोक्सी भन्दै सताउने
हामी कस्ता ?

काम होइन चिप्ला कुरा पत्याउने
सदैव थाइनामा लट्पटिने
आफू केही गर्न अघि नसर्ने
हामी कस्ता ?

बिगार्न जान्ने, बनाउन नजान्ने
अर्काको छिद्र खोतल्ने,
आफ्नो भ्वाँङ नदेख्ने
काम नगरी दाम कमाउन खोज्ने
हामी कस्ता ?

कोरा सिद्धान्तका फोस्रा गफ चुट्ने
आफूलाई मात्र धुरन्धर ठान्ने
हक अधिकार चालै नपाउने
हामी कस्ता ?

सही गलत नछुट्याउने
चोरलाई सभा, साधुलाई सुली चढाउने
उदेकको बुद्धि, विवेक र ज्ञानले भरिएका
हामी कस्ता ?

मुठ्ठीभर व्यक्तिले रजाइँ गर्दा
देशलाई पेवा ठानी मनपरी गर्दा
आँखा चिम्ली कानमा तेल हालेर बस्ने
हामी कस्ता ?

मातृभूमि रोई माटोले पुकार्दा
खोकिलामा हात घुसारेर बस्ने
जिउँदो लास जस्ता हुतिहारा
हामी कस्ता ?

शक्तिकै भक्ति गर्ने,
स्वार्थै स्वार्थमा चुर्लुम्म डुब्ने
चापलुसी गर्दै थालको लड्डु बन्ने
राष्ट्रियताको अथकित कुरा गर्ने
हामी कस्ता ?

स्वाभिमान भुलेका,
पहिचान गुमेका
लाजसरम,
इमानजमान नभएका,
नकचरा !
वीरता र पुरुषार्थको डिँङ हाँक्ने
हामी कस्ता ?

सत्ताशक्तिले मदमत्त भई
लोकतन्त्रको खिल्ली उडाउने
नटहरूका नौटङ्की हेर्दै मस्त हुने
हामी कस्ता ?

बाउन्न हन्डर त्रिपन्न ठक्कर
जत्ति खाए पनि
होस नखुल्ने कहिल्यै नचेत्ने
हामी कस्ता ?

सहने, सधैँ सहने
नसा नसामा रगत नउम्लने
चिसो चिसो बरफ जस्ता
हामी कस्ता ???

०००

काठमाडौं