नेपाली हास्यव्यङ्ग्य अनलाइन पत्रिका

इमान गयो
जमान पनि गयो
यो पाँच वर्षमा के के भयो
के के भयो ।

तन्काउन नमिल्ने
थन्क्याउन पनि नमिल्ने
अनि फेरि आएँ ।

बितेका वर्ष
चोक्टा माग्यौ
झोल दिएँ
दाउरा माग्यौ
कोल दिएँ
बिजुली माग्यौ
पोल दिएँ
व्हिस्की माग्यौ
बोत्तलको आफैँ तन्काएँ
तिमिलाइ खोल दिएँ
मैले के बिगारेँ ।

अझै
कुख्रा माग्यौ
गाँड दिएँ
बियर माग्यौ
खुदिको जाँड दिएँ
भात माग्यौ
हकुवा चामलको माड दिएँ
घरको खम्बा माग्यौ
ढोडको आड दिएँ
अडेस लाग्यौ
आफैं लड्यौ
मैले के बिगारेँ ।

रोजगार माग्यौ
बिना ढेवा भिषा दिएँ
भुराको फिस माग्यौ
तिम्रो नियास्रो मेट्न
तिम्रै बुढिलाइ किस दिएँ
त्यतिमात्र हो र?
डेरा दिएँ
केरा दिएँ
देख्छ्न भन्यौ
बोराको बेरा दिएँ
मैले के बिगारेँ ।

दबाइ माग्यौ
बेसार दिएँ
पानी माग्यौ
असार दिएँ
बिहे माग्यौ
भुसको कसार दिएँ
छिमेकिले निहुँ खोज्दा
गोलिले पसारदिएँ
मैले के बिगारेँ ।

हौ ठुले
चुनाव आयो त फेरि
तिमी मलाइ भोट देऊ
तिम्लाइ म हात्ति भाको नोट दिन्छु
म कोट लाउँला
तिमी अस्कोट लाऊ
आउ मिलौँ
तिमी बुढाभाका बा चील
म देश चिल्छु
तिमी सातु निल
म मार्सी निल्छु
तिमी फर्सी निल
म खसी निल्छु
नदि निल्छु
जहाज निल्छु
पुल, तुल, मूल निल्छु

लु त माइला
यस पटक पनि
मेरो चिन्हमा छाप लाऊ
म तिम्रो ढाडमा धाप लाउँछु
अनि तिमी
राडीमा बस या
खाडी जाऊ
म चैँ यस्तै यस्तै बोकेर
पाँच वर्षमा फेरि आउँछु
अरु तपसिलमा राखौँला ।

०००
काठमाडौं