नेपाली हास्यव्यङ्ग्य अनलाइन पत्रिका

सक्छौ र के तिमी,
साँच्चै सक्छौ ?
साँच्चै हो र सक्छौ भने
जलाइदेऊ सिंहदरबार !
त्यही बस्छन् शासक, तिम्रो असन्तोषका कारक
बस्दै आएका छन्-
दासत्व युगदेखि सामन्ती युग हुँदै पूँजिवादी युगसम्म ।

जनताको गाँस खोसेर,
मजदुरको हात बाँधेर,
यात्रुबाहक गाडी जलाएर
तिमी के पाउँछौ, कस्तो जनमुक्ति खोजिरहेछौ ?

साँच्चै हो र सक्छौ भने
ढालिदेऊ त्यही पर्खाल,
जसले शासक र शासितबीच साँधको काम गरिरहेछ
जसबाटै जन्मिरहेछन्-
असमानता, अशान्ति, असन्तोष !
दरबारबाट घरबारसम्म हुकुम चलुन्जेल
रहिरहनेछन्-
असमानताका पर्खालहरू,
अशान्तिका राँकाहरू,
असन्तोषका मुठ्ठीहरू !

के त ?
तिमी अझै साली पिटेर स्वास्नी तर्साइरहेछौ ?!

०००
काठमाडौं