नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

उसले,
विधिको कुरा गर्‍यो !
कमिसन र भ्रष्टाचारको बिरुद्ध जेहाद छेड्यो !
हजुरको सुनको लंकामा,
आगो झोस्न अगुल्टो उठायो !
त्यसैले महाराज !!!
उसलाई पाता कसियोस्,
कारबाही होस् !

उसले !
अपहरणकारीको बिरोध गर्‍यो !
बलत्कारीको पुत्ला जलायो !
सरकारी जमीन लुट्ने नेताका बारे लेख्यो !
सुन तस्करका बिरुद्ध मोर्चा कस्यो !
त्यसैले महाराज !!!
उसलाई पता कसियोस् !
कारबाही होस् !

उसले !
विभेदलाई अस्विकार गर्‍यो !
जनताको गाँस खोसेर,
घुस खाने हाकिमलाई लोप्पा खुवायो !
विदेशी राजदूतावास धाउने नेताहरूको पोल खोल्यो !
त्यसैले महाराज !!!
उसलाई पता कसियोस् !
कारबाही होस् !

उसले !
हजुरको बोलीमा लोली मिलाएन !
विचार, आदर्श छोडेर दास भएन !
हजुरको हातको इसारा बुझेन !
आँखाको चाल बुझेन !
त्यसैले महाराज !!!
उसलाई पाता कसिबक्सियोस् !
घरबाट बेदखल गरिबक्सियोस् !!
कारबाही गरी बक्सियोस् महाराज !!!

०००
गोरखा