नेपाली हास्यव्यङ्ग्य अनलाइन पत्रिका

संप्रस पौडेल :

फेसबुक हेर् न मोरा को-को छन् अनलाइनाँ
अरूका देब्रे होलान्, तेरा होउन् भौमान् दाहिना ।

राम्री स्वभावकी खोजी भित्र्याउनु नातिनी बुहारी
मायालु रिप्लाई अर्नु, नअर्नु अनलाइने जुहारी ।

राम्रो होस्, फ्रेन्ड सर्कल नहेर्नु भो जातपात
बात मारौँ न एकचोटी लाइदे स्काइपबाट ।

पाइन्ट च्यातेकै लाओस्, भोटो उध्रेकै होस् बरू,
बिग्रेको हैन नाति, रिह्याबमा सुध्रेकै होस् बरू ।

प्यारी हेर्नु आफ्नालागि, काली या गोरी कलर,
मोमकी प्यारी मो, बुढी सासुकी हुँदा के होला र !

फोटोमा पाउट मुख अरे नि ट्याग धेरै नअरेको होस्,
बानी केही छुच्ची भए नि प्याचअप अन्त नपरेको होस् ।

गाली नै गरे पनि, माया नमार्ने भैदिए
ढुक्कले मर्थेँ नाति ‘ब्लक नहान्ने’ भैदिए ।

खान केही चाहिएन आमोई भन्दे पुग्छ हे,
व्हाट्स एप लाइदे न, सर्कलमा कुन छ हे ।

बुद्धी यस्तो नहोस्, कपालमा जुम्रा भगाउन भनी
एकै भाँडो किराको दबाई नघुट्काउने तन्तनी ।

डाक्टर भन्ला दुई घण्टा अघि नै ल्याउनुपर्दर्थ्यो,
बीष खाएकै आधि घण्टा भो, अरू के गर्नुपर्दथ्यो?

घरैभरि चुईँचुईँ मुसाले खुबै सताए बुढो भनी
नलाओस् आगो घर सिध्देला, मुसा मर्दैनन् तैपनि ।

टिकटकमा लाइभ बसोस् कि, बरण्डाबाट खसोस्,
चियामा बेसार नहालोस्, इन्स्टामा कम नै फसोस् ।

पीँढी बढार्दै माइतीमा कम्मर भाँच्यो सिधै नभनोस्
जागिर खान गएकै दिन हाकिमले बिदाई नगरोस् ।

तैँले पनि नाति घरको काम सिक्दै गर्नु अब
गोलभेँडा पोल्दैकन अचार पिस्दै गर्नु अब ।

लुगा धुन सिकिराख्नू, बढार्न नि जानिराखेस्
जुग उल्ट्यो हेर केटा मैँ हुँ भो नठानिराखेस् ।

नातिनीबुहारी आफ्नै हो खप्की सहन्छु गुना न है
टुङ्टुङ् म्यासेज आइसक्यो मलाई पनि सुना न है ।

०००
मनहरी-५, मकवानपुर ।