नेपाली हास्यव्यङ्ग्य अनलाइन पत्रिका

प्रकाश अर्याल :

लक्ष्मी हौ अनमोलका निधि तिमी, नेपालका पुत्र हौ
काव्योद्यान रङाउने कुशलका, आदर्शका शूत्र हौ
जन्मेको दिन आज हो चहकको, संसारको उत्सव
तिम्रा लेखनका विशिष्ट रचना, सम्मानले उन्नत !!१!!

तेश्रो पुत्र भयौ अमोल घरको, मातापिता सद्गुणी
पन्ध्रौँ वर्ष महा विवाह कविको, साथै भइन् शालिनी
कस्तो हो प्रतिभा उमेर दशमै, साहित्यको सिर्जन
उम्दा छन् कविता र काव्य रसका, के हुन्छ यो निर्जन ? !!२!!

के हुन्थ्यो गतिरोध लेखन कला, दौड्यो सँधै साथमा
गङ्गाको गतिमा बगे कलम ती, देबी भइन् बासमा
झेल्दै आर्थिक भारका क्षणहरू, नैराश्यका दुर्दिन
आफ्नो जे छ त्यही रमाइरहने, निर्लोभ कस्तो मन ? !!३!!

यी हाम्रा घरका वरिष्ट कवि हुन्, संसारमा चर्चित
देख्दा ईङ्लिसमा अनेक रचना, लाग्दो भयो गर्वित
मीठो भाव भरी छ रम्य कृति ती, ठेली भयो मोहक
विद्यार्थी जनले अपार मनले, गर्दा भए शोधक !!४!!

देख्दा थर्थर काँपका गरिव ती, इस्कोट खोल्दै दियौ
बैरागी मन भै चुरोट मुखमा, राखेर धेरै पियौ
पापी क्यान्सरले सताइ कविको, गल्दो भएको तन
अस्ताए प्रतिभा महान् अतुलका साहित्यका यी धन !!५!!

०००
काठमाडौं ।