नेपाली हास्यव्यङ्ग्य अनलाइन पत्रिका

घनश्याम रेग्मी :

खाए लुछेर सबले यस भूमिलाई
कुत्ता हुँडार जसरी छ यहाँ लुछाइ
नेता मिलेर अति हाल्न पुगे धराप
यो देशमाथि किन पर्छ सधैँ सराप ।१

ती भीम मल्ल अनि भीम सपूत छोरा
काजी थिए अमर सिंह परेर होरा
जो देश भक्त उसमाथि खनिन्छ राप
यो देशमाथि किन पर्छ सधैँ सराप ।२

सौ चार वर्ष गुमराह गरेर राखे
आफन्तमात्र अधिकार खिचेर पोसे
हामी सबै जन मिलेर भयौँ खिलाप
यो देशमाथि किन पर्छ सधैँ सराप ।३

सत्ता र देश यिनकै परिवार मात्र
गर्थे रजाइँ सबमा खल पात्र साथ
होस् शान्त देश बहुतै गरियो प्रयास
यो देशमाथि किन पर्छ सधैँ सराप ।४

कोशी र गण्डक सके अघिनै लुछेर
सुस्ता रुँदै छ अझसम्म कठै दुखेर
सीमा सधैँ दुखिरह्यो छ अझै विलाप
यो देशमाथि किन पर्छ सधैँ सराप ।५

अग्ला हिमाल चुचुरा अनि फाँट बेंसी
हामी मिलेर बसियो सदभाव राखी
फाटो गरेर जनताबिच भो खिलाफ
यो देशमाथि किन पर्छ सधैँ सराप ।६

०००
चितवन, हाल नेपालगञ्ज