नेपाली हास्यव्यङ्ग्य अनलाइन पत्रिका

प्रेमदत्त कलौनी :

राणा शासन त्यो भएन गतिलो भन्दै सबै कुर्लिए
तातो रक्त दिए यहाँ सहिदले मान्छे सबै उर्लिए
फाले शासन त्यो मिलेर सबले आयो प्रजातन्त्र यो
आफैंमा झगडा गरेर दलले ढल्दो भयो तन्त्र त्यो ।

आयो तन्त्र नयाँ यसै मुलुकमा पञ्चायती नामले
नारा मात्र थिए विकास पथका खोक्रा थिए कामले
राजाको अधिकार सीमित भयो चर्केर आन्दोलन
नौला बन्न गए विधान ननिका नौला बने कानुन ।

गर्थे शासन मोजले दलहरू आफन्त पोस्दै गए
ठूला उद्यम जो थिए मुलुकका सम्पूणर् बेच्दै गए
भ्रष्टाचार गरि बसे महलमा यो देश लुट्दै रहे
सोझा सज्जन टिक्दथे कति यहाँ अन्यत्र भाग्दै गए ।

हत्याकाण्ड भएर मत्थर भए पत्ता नलाग्ने भए
राजाको पनि वंशनाश हुनमा शंका अनेकौँ थिए
गर्छौं देश विकास तीब्र गातिले भन्दै बडा गर्जिए
ल्यायौं यो गणतन्त्र नागरिकको इच्छा भनी गर्जिए ।

छाडा छन् युवती यहाँ दिनदिनै उन्माद बढ्दै गयो
तन्नेरी जति छन् विदेशतिर गै यो भूमि बाँझो भयो
हाहाकार बढेर यो मुलुकमा के दीन टिक्लान् अब
आमाको तन यो चिरेर गहिरो खाटा नलाऔँ अब ।

०००
कञ्चनपुर