विमल अर्यालआएपछि
तन्त्र फेरिए पनि विभेद हटेन जति पटक रगत बगाए पनि बलिदानको अर्थ भएन भुइँ मानिसहरुको मुहार धपक्क बलेन अझै कालो बादल वरिपरि चाँदीको घेरा देख्न सकिएन ।
विमल अर्याल :
आएपछि अलि ठाँटिएर आऊ
आँखामा आँखा जुधाउन सक्ने गरी आऊ
कसैले केही सोध्यो कि
आत्मविश्वास सहित हाँसेर
जवाफदेही भएर आऊ ।
हिजोकैं पिपलपाते भएर होइन
मुखमा धेरै जिब्रो हालेर होइन
नर्कटको खुट्टा फ्याँकेर
इस्पातभन्दा बलियो भएर
हातखुट्टा शरीर बोकेर आऊ
अनैतिकताको रछ्यानमा लड्ने
पाइला पाइलामा ऱ्याल चुहाउने
मिठा मिठा शब्दजाल बुनेर
भित्र भित्रै कैंची चलाउन खप्पिस
धुरन्धर बाठो स्याल जस्तो होइन
सरल सोझो इमान्दार बनेर आऊ ।
हिजोभन्दा आज
ओरालो उन्मुख छ जीवन
सङ्कटमा परेको छ अस्तित्व
परनिर्भर हुँदै छ दैनिकी
अन्तर कलहमा छ- सामाजिक, आर्थिक गतिविधि
सद्भाव सद्भावनाका बाहक
सच्चा उत्प्रेरक बनेर आऊ
तन्त्र फेरिए पनि विभेद हटेन
जति पटक रगत बगाए पनि
बलिदानको अर्थ भएन
भुइँ मानिसहरुको मुहार धपक्क बलेन
अझै कालो बादल वरिपरि
चाँदीको घेरा देख्न सकिएन ।
०००
काठमाडाैं
Subscribe
Login
0 Comments
Oldest
