नेपाली हास्यव्यङ्ग्य अनलाइन पत्रिका

शालिग्राम अर्याल :

को हो सज्जन-दुर्जनै चिनिसकेँ चिनेर नै के भयो ? ।
न्यायान्याय विपक्ष पक्ष झगडा चिन्दा नि खै के भयो ? ।।
बैरी दुश्मनका विरुद्ध कविता लेखेर पो के भयो ? ।
सत्यासत्य विवेक ब्रह्मदिलले देखेर पो के भयो ? ।।१।।

चिन्दै दुश्मन तोकियो तर यहाँ तोकेर पो के भयो ? ।
यो आन्दोलनलाई रोक भनियो ! रोकेर पो के भयो ? ।।
ठोक्यो युद्ध गर्यो नि भ्रष्टहरूमा ठोकेर पो के भयो ? ।
झन्डा बोक भन्यौ, नि शान्ति निहुँमा बोकेर पो के भयो ? ।।२।।

देशै दुश्मनले लुटेर जनता लुट्दा सदियौँ सह्यौँ
शाहीकाल ढल्यो ढलेन लुटको धब्बा निशानी रह्यौँ ।।
भ्रष्टाचार र तस्करी बढिरह्यो हत्या बलात्कार हे ! ।
भो भो ए कवि हो नलेख कविता ! सुन्दैन सर्कारले ।|३।।

०००
पुरानाे पाेकाे (२०८१)