नेपाली हास्यव्यङ्ग्य अनलाइन पत्रिका

गायत्री  परिराेशनी :

आहा गज्जब छ,
हामी फेरि उठ्नेछौँ
हामी फेरि कुट्नेछौँ,
हामी फेरि लुट्नेछौँ
हामी फेरि छुट्नेछौँ
हामी फेरि खरानीलाई भुट्नेछौँ ।

नैतिकता बासेपछि,
सबैलाई, भद्र होइन अभद्र
राम्रो होइन नराम्रो
संस्कृति होइन विकृति
सभ्यता होइन नग्नता
बनाउन होइन,
भत्काउन र जलाउन
यसैमा सबैलाई
मस्तसँग रमाउन मनपर्छ ।

त्यसैले त हो नि,
वा गज्जब,
भ्रष्टाचारले भकारी भर्न
अझै बाँकी छ
कूर्चि मोह भत्किएको छैन
पाँच सात पटक
नाथे माननीय हुँदैमा
कति बनाउनु देश ?
माटो जलाएर खरानी
बनाउन बाँकी नै छ ।

त्यसैले, हाम्रा प्यारा
बा, दाजु, भाउजुहरुको
देश बनाउने रहर पुगेकै छैन
यस्सो एकै दिनमा हजारौँ गोली
अरुका सन्तानलाई बर्साएको हो
आफ्‌नालाई नहानेपछि,
जनमतको कदर घटेकै छैन ।

हामी भन्दैछौँ,
फल्नो देशभरिको बा नै हो,
सर्लक्क झ्याप्पै चुनाब गराएर
जस्ताको तस्तै,
पुराना जति सबैलाई निस्तै
ल्याउने हो,
अब अलिकति बाँकी रहेको विकासलाई
निकास नै गर्ने हो,
पीर पटक्कै नमानौँ महोदय
हाम्रा सात पुस्ता छोडेर
अरु सक्ने जति मार्ने हो ।

हो साँच्ची यतिबेला
जताततै नैतिकता बासेको छ ।
देश खरानी बनेर उडिरहँदा
डढाउनेहरुको मन मस्तले
हाँसिरहेको छ,
थुइक्क हामी स्वाभीमानी नेपाली
देश जलाउनलाई आर्यघाट
लान खोज्नेहरुकै अहिले समेत
हाटबजार चर्किएको छ ।
दलधारी मूरकट्टाहरु अझै
अमूल्य बन्न खोज्दैछन् यहाँ ।
मस्तले असोजे झरी परेर के गर्नु ?
नैतिकताको खडेरी परेको छ ॥

०००
स्याङ्जा