नेपाली हास्यव्यङ्ग्य अनलाइन पत्रिका

गायत्री लम्साल :

म, उनी, तिनीहरु, उनीहरु
ब्राण्डेड हुन पल्केका मान्छे ।
नैतिकता बेचेर किनेको
ब्राण्डेड मष्तिस्क ।
भ्रष्टाचार गरेर किनेको
ब्राण्डेड जुत्ता ॥

बाबा र आमालाई
वृद्दाश्रममा पठाएर किनेको
ब्राण्डेड स्वीटर ।
छोराछोरीलाई ज्यूँदै
टुहुरा बनाएर किनेका
ब्राण्डेड कान्छी आमा र
कान्छा बाबाहरु ॥

लाज र शरमलाई बेचेर किनेको
मिडियाको ब्राण्डेड माया ।
अलिकति देश बेचेर किनेको
जे गरे तापनि
उन्मुक्ति पाइने
ब्राण्डेड न्याय ॥

आहा हामी मस्त छौँ ।
ब्राण्डेड मान्छे बन्नलाई
अँगालो भरि
फूलका माला बोकेर
आतुर छौँ स्वागत गर्न
यिनैलाई ब्राण्डेड मान्छे भन्नलाई ॥

साधारण मान्छे,
ब्राण्डेड मान्छे भएपछि
ज्यूँदो लाश भएर
आर्यघाटमा जलिरहँदा समेत
आफूले आफूलाई
खास ठानिरहन्छ ।
विकासलाई सख्त घाइते बनाउने
ब्राण्डेड झटारो हानिरहन्छ ॥

०००
स्याङ्जा