नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

चटके टाउके नाची, उखानमा हँसाउँछन्‌
खित्का छोडेर हाँसेको देखी बाँदर गाउँछन् ।
बाँदरे तालमा जम्मै हाँस्ने, हँसाउने भए
हास्यव्यङ्ग्य उनै गर्छन् जमाना कविका गए ॥

आलु खाएर पिँडाको धाकधम्की खन्याउने
बाँदर्नी नग्न मैयाँको बन्यो काम कन्याउने ।
राँकोभन्दा ठुलो डाँको ढेडुको हुन्छ हैकम
झर्दैन रुखको ढेडु नतोडे उसको दम ॥

बाँदर्नी, बाँदरे पारा, साराले झार्छु भन्दछन्‌
मुन्ट्याएर धुरीबाट उत्तानो पार्छु भन्दछन् ।
लाखु भेला भई जम्मै उखुमा पल्किएपछि
बाँदर्नी ढेडुको वार्ता सधैँ चल्छ बसी–बसी ॥

किसानी मल भन्दैछन् ढ्याङ्ग्रो ठोकेर देशमा
बाँदरे खेल खेलेर खेती छैन मधेसमा ।
तमासा झुटको हेर्ने सर्वहारा छ काँतर
निकासी लुटको गर्ने, भ्रष्टाचारी छ जाँगर ॥

चटके, नाटके चाला बन्यो नाङ्गो बराबर
तन्नेरी तरुनी जागे, जागेन तर फापर ।
उखु धान मकै बाली दाइँ गर्दछ बाँदर
तमासा देखियो आज, गाईजात्रा भयङ्कर ॥

०००
रानीवन, काठमाडाैं