नेपाली हास्यव्यङ्ग्य अनलाइन पत्रिका

१.
नामका लागि मरिहत्ते गर्ने भोकाहरू देखी
आफूलाई प्रखर देखाउने बोकाहरू देखी
के लेखाउँ साहित्य खेताला हालेर हजुर ?
दिक्क लाग्छ क्षणमै फुट्ने पानीका फोकाहरू देखी ।

२.
चोरीचोरी शब्दहरू छाप्न, व्यस्त छौ अरे
साहित्यको पसल थाप्न, व्यस्त छौ अरे
चाकडी, चाप्लुसी, सम्मान, पदक, पुरस्कार
दोसल्ला, खादाहरू खाप्न, व्यस्त छौ अरे ।

३.
मिश्रित वेदनालाई भुलि, स्वार्थी बन्छ मान्छे
अत्यधिक विषाक्त भोगाइ, बिर्सिरन्छ मान्छे
आफ्ना दिनहरू सकिएको, थाहा पाउँदापाउँदै
मर्नेहरू मरिरहून्, म अमर छु भन्छ, मान्छे ।

४.
बालकहरूदेखि बृद्धासम्म भुट्नेले जिते
व्यक्तिको के कुरा र देश लुट्नेले जिते
शान्ति सुरक्षा छैन सपना बेच्छन् सबै
पुलिसले पक्डिन नपाउँदै छुट्नेले जिते ।