नेपाली हास्यव्यङ्ग्य अनलाइन पत्रिका

आजका युवा
हिँड्दा टाइटमा
डुल्दा बाइकमा
सहमति फाइटमा, नभए
केको आधुनिकता ?

खाजामा पिजा खाएन भने
हाँस्दा गिजा देखाएन भने
बोल्दा अङ्ग्रेजी घुसेन भने
बफ मोमो मुखमा ठुँसेन भने
फाटेको पाइन्ट लाउँदैन भने
कनेर गीत गाउँदैन भने
केको आधुनिकता ?

दौरा–सुरुवाल फाल्दैन भने
गर्धनमा टुप्पी पाल्दैन भने
पाइन्ट तल झारेन भने
गन्जीभन्दा सट छोटो पारेन भने
लहरासहित मोबाइल बोकेन भने
चुरोट खाएर खोकेन भने
केको आधुनिकता ?

महिलाले छाती देखाइन भने
भाइ भनेर नाति देखाइन भने
हिन्दी सिरियल हेरिन भने
दिनदिनै लुगा फेरिन भने
केको आधुनिकता ?

छोटो मिडी लगाएन भने
हिन्दी गीत गुन्गुनाएन भने
डान्सबार धाएन भने
चुइङ्गम खाँदा पड्काएन भने
गलफ्रेन्ड–ब्वाइफ्रेन्ड फेरेन भने
कलेजकै ड्रेसमा सिनेमा हेरेन भने
केको आधुनिकता ? केको आधुनिकता ?

जुरोपानी, झापा हाल  : काठमाडौं