नेपाली हास्यव्यङ्ग्य अनलाइन पत्रिका

खोलो भाषणका पाक्छन् फत्कन्छन् कति फत्फत
पोतौँ भाषण भित्तामा पारौँ न अझ लत्पत
गरौँ भाषणकै खेती फल्छ भाषण बोटमा
टिपौँ भाषणकै बाला राखौँ भाषण ओठमा ।

रोप्दै भाषणकै खेत धानैधान फलाउँला
तिनै धान चपाएर वर्षौं सत्ता चलाउँला
सक्छौँ भाषणले हामी तातो सेल पकाउन
सक्छौँ भाषणमै सोझा छक्याउन फकाउन ।

बत्ती भाषणले बाल्छौँ देशै बदल्न थाल्दछौँ
धारामा नचुहे पानी हामी सर्लक्क हाल्दछौँ
उर्ले भाषणकै भेल निर्धो बग्दछ भेलमा
माछा भाषणका मर्छन् तार्न सकिन्छ तेलमा ।

पैसा भाषणको हाम्रो आफ्नो पेसा चलाउँछौँ
बोक्छौँ भाषणको राँको जे जे भेट्यो जलाउँछौँ
हामी भाषणले बेर्छौं शब्दजाल बनाउँछौँ
राजनीति खुवै गर्छौं भाषणमा गनाउँछौँ ।

बन्छन् भाषणले साँघु गुड्न थाल्दछ मोटर
हाम्रा भाषणमा जस्तो चमत्कार कहाँ छ र ?
हाम्रा भाषण पुग्नेछन् नेपाली घर गोठमा
निर्धा भाषणमा भुल्छन् हामी भुल्नु छ नोटमा ।

प्राप्चा– ७, ओखलढुङ्गा