भूपी शेरचनघण्टाघर
कुनै फाटेर
कुनै मुसाले काटेर
कुनै छोरा–नाति
एक–एक गरी
फौजका सब पुराना जर्सी सिद्धिए ।
तर जतनसाथ बचाइराखेको
फौजी जीवनका दुइटा प्रिय चिन्ह
एउटा पुरानो डिजाइनको ठूलो–गोलो जेबघडी
छातीमा झुन्ड्याएर,
अनि एउटा पुरानो टोप शिरमा लाएर
माछा मार्ने निहूँले
बुढेसकालमा लामा
र दिक्दारे दिन बिताउने
एउटा पेन्सिनवाला बूढो लाहुरेझैं
रानीपोखरीमा बल्छी हालेर
तटमा उभिएर निरन्तर
झोक्रिरहेछ घण्टाघर ।
‘घुम्ने मेचमाथि अन्धो मान्छे’ बाट
Subscribe
Login
0 Comments
Oldest
