बूँद रानाहामी
पैह्रो जाने डाँडामुनि बस्ता भयौं हामी
के फेरिन्थ्यौँ जस्ता थियौं तस्ता भयौं हामी ।
लुटी खानेलाई ठुङ्ने हुती भए पो त
आफैलाई घरीघरी डस्ता भयौं हामी ।
ठूलै माछो छोपी भुटी खाने दाउ थियो
आफ्नै महाजालभित्र फस्ता भयौं हामी ।
दुनियाँमा को नै होला हामी भन्दा घाती
गाला मुसारेर भाला धस्ता भयौं हामी ।
आफ्नो भान्सामा तेलको छैन थोपो छिटो
पराइका गोडा घिउ घस्ता भयौं हामी ।
हाम्रो बाटो उन्नतिको भनी गथ्र्यौं दावा
घिरिंगघाट पुर्याउने रस्ता भयौं हामी ।
काठमाडौं
Subscribe
Login
0 Comments
Oldest
