अनि दङ्ग पर्छौ
मुलायम कुर्चीमाथि बस्छौ अनि दङ्ग पर्छौ
आशावादी जनतालाई डस्छौ अनि दङ्ग पर्छौ ।
काम अनि कर्तव्यलाई चकनाचुर बनाएर
घुसखोरीका बिटाहरू कस्छौ अनि दङ्ग पर्छौ ।
दोहोरी र मसाजकेन्द्र बैठक बस्ने थलो तिम्रो
वासनासँगै वास्नादार घस्छौ अनि दङ्ग पर्छौ ।
जनता अब लाटा छैनन् चुनौती छ तिमीलाई
कुनै दिन निकै तल खस्छौ अनि दङ्ग पर्छौ ।
देशमा अब जनता आफैं विधान बनाउनेछन्
पालैपालो कालो खोरमा पस्छौ अनि दङ्ग पर्छौ ।
‘प्रवासका अक्षरहरू’ बाट