नेपाली हास्यव्यङ्ग्य अनलाइन पत्रिका

निर्दाेष यी आँखाबाट
अपहरण गरेर तिमीले
बेपत्ता पारेका सपनाहरूको यादमा
आँखाबाट पोखिएर मन
छातीमाथि जमेको पोखरीमा
तिमीले पौडी खेली रह्यौ
मैले आँसु बहाई रहेँ

कलिलो मायाको घाँटी निमोठेर तिमीले
मेरो आँखाको सपना मात्र लुटेनौ
ओठको मुस्कान र मुटुको धड्कन
मात्र पनि लुटेनौ
लङ्गडाको हात समाउने बाहानामा
वैशाखी समेत लुटेर तिमीले
हिँड्न त के ! उभिनै नसक्ने बनाई दियौ

यसरी नै –
प्रकाशले सूर्यको साथ छोडी दियो भने
कोइलीले वसन्तलाई बिर्सी दियो भने
वास्नाले फूललाई धोका दियो भने
अथवा
भगवान्ले भक्तसँग बदला लियो भने
अरु के नै बाँकी रहला र यहाँ ….. ?

थलारा, बझाङ