नेपाली हास्यव्यङ्ग्य अनलाइन पत्रिका

१. फुलेको जवानी

त्यो कालो जवानी यो सेतो जवानी
त्यो रातको जवानी यो दिनको जवानी
त्यो सुतने तर यो उठाउने जवानी
त्यो कोपिला यो फुलेको जवानी ।

त्यो तनको जवानी, यो मनको जवानी
त्यो बनको जवानी यो घरको जवानी
त्यो सिक्ने अनि यो सिकाउने जवानी
त्यो पालुवा यो फुलेको जवानी ।

त्यो जाने जवानी, यो बसने जवानी
त्यो मागने यो दिलाउने जवानी
त्यो भोको अनि यो अघाउने जवानी
त्यो काँचो तर यो फुलेको जवानी ।

त्यो ठान्ने जवानी, यो जान्ने जवानी
त्यो छान्ने जवानी यो धान्ने जवानी
त्यो जोशको तर यो होसको जवानी
त्यो फलेको तर यो फुलेको जवानी ।

त्यो हेर्ने जवानी, यो देख्ने जवानी
त्यो बन्ने अनि यो बनाउने जवानी
त्यो दुईको जवानी यो सबैको जवानी
त्यो पुज्ने अनि यो पुजिने जवानी ।

२. दाह्री र धर्म

सुशिल’दा ले नवाज सरिफलाई सोध्नु भयो
तपाई मुसलमान नभएर पनि –
पाकिस्तानको प्रधानमन्त्री कसरी बन्नु भयो ?
नवाज सरिफले जवाफ दिए
जसरी तपाईं मुसलमान भएर पनि नेपालको प्रधानमन्त्री बन्नु भयो !

सुशिल’दाले आफ्नो दाह्री छाम्दै भन्नु भयो
तपाईं मेरो दाह्री देखेर झुक्किनु भयो !
नवाज सरिफले आफ्ना चिल्ला गाला सुम्सुम्याउँदै भन्नु भयो
तपाईंले मेरो दाह्री नदेखेर झुक्किए जस्तै भयो !

बत्तिसपुतली, काठमाडौं