नेपाली हास्यव्यङ्ग्य अनलाइन पत्रिका

नेता बन्न भारत जाऊ
खाना खजाना उसकै ल्याऊ
हिन्दी सिरियल गाना गाऊ
फर्की देशमा नारा लाऊ–
“विदेशी बिस्तारवाद भगाऊ”
के हो स्वदेशी के हो विदेशी ?
पहिला त्यत्ति त पत्ता लगाऊ !
आफ्नो खुम्चनवाद जगाऊ !!

विदेशी बिस्तारवाद भगाऊ
माक्र्स लेनिनका फोटा सजाऊ
माओ आफ्नो नेता बनाऊ
लुगा उनका जस्तै लगाऊ
को हो स्वदेशी को हो विदेशी ?
पहिला त्यत्ति त पत्ता लगाऊ !
विदेशी बिस्तारवाद भगाऊ !
आफ्नो खुम्चनवाद जगाऊ !!

पत्नीलाई डिभी भराऊ
छोराछोरी विदेश पढाऊ
देशको पैसा उतै लगाऊ
आदेश सहयोग माग्न जाऊ
के हो विस्तारवाद भनेको ?
पहिला त्यत्ति त पत्ता लगाऊ !
विदेशी बिस्तारबाद भगाऊ
आफ्नो खुम्चनवाद जगाऊ !!

विदेशी बिस्तारवाद – मुर्दावाद मुर्दावाद !!
स्वदेशी खुम्चनवाद – जिन्दावाद जिन्दावाद !!
बत्तिसपुतली, काठमाडौं