नेपाली हास्यव्यङ्ग्य अनलाइन पत्रिका

हे ए-३२० न्यारोबडी विमानदेवी परमेश्वरी ! तिमीलाई हाम्रो कोटी कोटी प्रणाम । हाम्रो वायुसेवा निगमको आँगनमा तिमीले २७ वर्षपछि आफ्ना पवित्र पाउ राख्यौ, हामी धन्य भयौँ । हामीले पाताल प्रदेशबाट तिमीलाई ल्याएको हुँदा सर्वप्रथम तिलानी-पानी छर्केर तिमीलाई चोख्याएका छाैँ । साढे सात करोड डलरको ठूलो धनराशि खनखन्ती तिरेर ल्याएको हुँदा तिमीलाई नेपाल भूमिमा साढे सातको दशा नलागोस् भनेर विशेष पूजा अर्चना गरेका छौँ । विगतमा हामी \’पञ्चमहाभूतहरू\’ अर्थात् कमिसन, भ्रष्टाचार, राजनीतिक हस्तक्षेप, निकम्मा व्यवस्थापन र ठग कर्मचारी मिलेर बिटुल्याएको अन्तर्राष्ट्रिय विमानस्थलको आँगनलाई पवित्र पार्न \’पञ्चकन्या\’मार्फत तिमीलाई स्वागत गरेका छौँ । \’पञ्चैबाजा\’ बजाएर विमानस्थल वरपरदेखि न्युरोडगेटसम्मकै भूतप्रेतलाई तर्साएका छौँ । \’पञ्चबलि\’ पनि दिने बारेमा सोचेका थियौँ तर अघिल्लो पालि कणर्ाली विमान उडाउने बेलामा बोको बलि दिँदाका दृश्य पत्रपत्रिकाहरूले छापेर हामीलाई नै उडाएकाले हाललाई नरिवल फुटाएका छौँ । रगतको सट्टा \’पञ्चामृत\’ चढाएका छौँ । देवीलाई बोकै चाहिने हो भने पहिलो उडान भर्ने दिन खुसुक्क व्यवस्था गरौँला ।

केही महिनाअघि मात्रै चीन भूमिबाट ल्याएको विमानले हामीलाई दुःख दिएर टोक्नु न बोक्नु भएको छ । ल्याएको सात महिनामा त्यो कुम्भकर्ण तीन महिना सुत्यो, चार महिना मात्र उड्यो । अब त्यस्त्ाो नहोस् र तिमी नयाँ विमानलाई कुनै रोगव्याध नलागोस् भनेरै हामीले पूजा आयोजना गरेका हौँ । हाम्रा मनमा \’ नपाउनेले केरा पायो, चियामा चोपेर खायो\’ भन्ने पुरानै भावना उत्पन्न नहोओस् भन्ने पवित्र कामनाले बोक्रोसहितको केरा चढाएका छौँ । पहिला पहिलाजस्तो अब यो विमान \’बाँदरका हातमा नरिवल\’ नहोस् भनेर नरिवल पनि चढाएका हौँ । हे विमानदेवी ! तिमीले हामीलाई धोका नदिनू । नबिग्रनू । ग्राउन्डेड नहुनू । दिनैपिच्छे सुनका अन्डा पारेको पारेकै गर्नू । डलर झारेको झारेकै गर्नू । धमाधम हाम्रो नेवानिलाई नाफामा लगिदिनू । शानेवानिका पालाको जस्तो हाम्रो विमान नै खानेबानी हामी घटाऔँला । दलाललाई सिट बेचेर कमिसन खाने बानी हटाऔँला । आइन्दा रित्ता सिट हल्लाउँदै विमान नउडाऔँला ।

तिमी हाम्री अन्नदाता, हाम्री विधाता । अब हामीले तिमीलाई उडाएर सुत्न लागेको हाम्रो निगमलाई उठाउनु छ । हिँड्न लागेको हाम्रो जागिरलाई बसाउनु छ । त्यसैले हामीले तिम्रो आराधना गरेका छौँ । दीप जलाएका छौँ, नैवेद्य चढाएका छौँ । शिरदेखि पुच्छरसम्म धूपधुवार गरेका छौँ । नाकको चुच्चोदेखि खुट्टाका नङसम्मै अपुंगो दलेका छौँ । तिमीले शरीरमा धारण गरेको भैरवको टाटुमा पनि अविर छरेका छौँ । हामी कामना गर्छौं, तिम्रो उडानमार्गमा बिरालाहरूले बाटो नकाटून् । गिद्धहरूले नाकमा ठुङ्न नआऊन् । कागहरूले निधारमा बिस्टा नगरून् । स्यालहरूले चक्कामा छिर्के नलगाऊन् । साँढेहरूले हान्न नआऊन् । मुसाहरूले धावनमार्गमा भ्वाङ नपारून् । पहाडको थुम्कोले बाटो नछेकोस् । टेलिफोनका टावरमा ठेस नलागोस् । तिमीलाई भीआईपी, भीभीआईपी भनाउँदाहरूले नटोकून् । कुनै लमिजा, धमिजा, कीरा, घुनपुत्लीहरू नलागून् । मन्त्री, प्रधानमन्त्री र नेताहरूले भष्मासुरहरूलाई निगममा अध्यक्ष वा महाप्रबन्धकमा नियुक्त गरेर नपठाऊन् । हे ३२० देवी ! तिमीले अब ४२० हरूका फेला पर्नु नपरोस् । श्री न्यारोबडी विमानदेवी परमेश्वरीको- जय होस् ।
नेपाल साप्ताहिक