नेपाली हास्यव्यङ्ग्य अनलाइन पत्रिका

दाम कमाउने भनी
नाम कमाउने भनी
सहर पस्यो हर्के
सस्तो कोठा खोजेर
सहरमा बस्यो हर्के ।
बिस्तारै
सहरको हावाले छोए पछि
नयाँ ढाँचामा देखियो
हर्केबाट हर्कमान लेखियो
बिस्तारै दाम कमाउन सिक्यो
सहरमा रमाउन सिक्यो
म्यानपावर दलानी गर्दा
कतिपटक जेल प¥यो
अब झन पाक्दै गयो हर्के
जग्गा दलाल पनि भयो हर्के
अब
कुरा गर्न जान्यो
पैसो कमाउन जान्यो
मान्छे घुमाउन जान्यो
पैसो कमाए पछि
शेयर किन्न थाल्यो हर्के
नेता चिन्न थाल्यो हर्के
कसैलाई काम मिलाई दिन्छु भन्दै
कसैलाई पद मिलाई दिन्छु भन्दै
दाम गिन्न थाल्यो हर्के ।

अब उसलाई
हर्केबाट
हर्कमान हुँदै
हर्क सर भन्न थाले
हर्क सर पनि साइकल छोडी
गाडीमा नै हिंड्न थाले
नेता उनकै पछि लाग्न थाले
हुँदाहुँदा बैंक पनि
उनकै पछि भाग्न थाले
अब हर्क सरलाई भेट्नै गाह्रो
हर्क सरको महलमा टेक्नै गाह्रो ।

एक दिन अखबारमा
ठुलो फोटो सहित छापियो
हर्कमान करोडौँ ठगीमा जेल
मानव तस्करी
चरेस तस्करी
जाली कागजात
बैंक ठगी उसको खेल ।

केही समय पछि
टुप्लुक्क देखिए हर्क बसपार्कमा
झुत्रे लुगा, लामा दाह्री
कतै जान खोज्दै थिए बस पार्कमा
मैले सोधेँ
हर्क दाइ कता हो आज
हिजो अर्कै आज अर्कै
के हो नि राज ?
उनले भने
गरिब भएर पनि देखँे
धनी भएर पनि देखेँ
गरिब भएर भन्दा
धनी भएर जिउन गाह्रो छ
गरिबको भन्दा धनीको
प्याला पिउन साह्रोे छ ।
जो गरिब छन् तिनी त्यस्तै देखिन्छन्
तर धनी जस्ता देखिन्छन् त्यस्ता छैनन्
जब खुल्छ तिनको पोल
तब हुन्छ सबै डमाडोल ।

जीवनको थकान मेटाउन हर्के
मसँग सँगै गाउँ नै फर्के ।
दाङ, हाल– काठमाडौं