नेपाली हास्यव्यङ्ग्य अनलाइन पत्रिका

बगर, पाखा, कान्ला, बुट्टा कुँद्दै
खोला खहरेको प्रवाह नगरी
गाउँटोलको ख्यालै छैन
बाली बिरुवा नष्ट पार्दै
लठ्ठारिएर हिँडेका एक हुल कुकुरहरू ।

एउटी कुकुर्नीको गन्ध सँुघ्दै,
जीवनमा पहिलो चोटी
अरुलाई उछिनेर
आफूसँग संसर्ग गर्ने
उसलाई गर्भवती बनाउने
लुच्चो लालसाले ज्यान छाडेर
कुकुर्नी नछोडि पछिपछि
दौडिरहेछन् एक हुल कुकुरहरू ।

भुक्नु भुके, ढुक्नु ढुके
न कसैको प्रवाह गरे
न मतलब राखे
चोट सहेर, भोकप्यास त्यागेर
घरि यता घरि उता
लखेटिँदै, खेदिँदै
एक छिन नछोडी
पछ्याउँदै छन् एक हुल कुकुरहरू ।

अपशोच,
एक वर्षपछि एक पटकको
समागम समयमा
लुते, ख्याउटे, खुलिएको
पाङ्ग्रे कुकुर जोल्ठिन पुग्छ,
दङ्ग छन् आसे कात्तिके कुकुरहरू ।

रामेछाप