नेपाली हास्यव्यङ्ग्य अनलाइन पत्रिका

१.के हो उपसन्त नेता !

जाँदा जाँदै करोडौ, रकम हजम भो, भन्दछन् पत्रकार
बाड्यौँ रे कोटरीका, अनुचर जतिमा, लाख लाखौं अपार ।
भाँच्यौ के मूल्य आस्था, रकम कलममा, सन्त ठान्थ्यौं सबैले
जाँदा जाँदै करोडौं, रकम लुटिगए, भन्न थाले सबैले ।

बोल्द्यौ ठ्याम्मै नढाँटी, कति मधुर अहा ! नाम तिम्रो सुशील
मेटिन्नन् दाग काला, गलत लत लिँदा, हुन्छ नेता कुशील ।
बीपीको वाद बिर्सी, तरल किन भयौ ? सन्त–धारा टुटाई
बोल्द्यौ हे सन्त नेता, कति रकम दियौ, कोश रित्तो बनाई ।

२. भद्र सहमति !

बिर्स्यौ तिम्ले विगत दिनका, भद्र सल्लाह आज
नेपालीका अधिक मनले, भन्दछन् छैन लाज ?
माथा चुम्दै इजत जसरी, आर्जियौ सन्त नेता
फेदी पुग्दै, धुल धुसर भो, के गर्यौ सन्त नेता ?

जल्ले यत्रो तिकडम चिरी, संविधानै सजायो
त्यस्तो मान्छे, सहमति भुली, बेसरी नै ढँटायो–
भन्छन् सब्बै, मति खति भयो, सादगीका सुशील
बिर्स्यौ आफ्ना, वचन कसरी ? भन्न थाले कुटील ।

धादिङ