नेपाली हास्यव्यङ्ग्य अनलाइन पत्रिका

प्रश्न– आधुनिक युवतीहरू दुवै हातको सदुपयोग कसरी गर्छन् ?
उत्तर– मेहेंन्दीले सिंगारेर र घरिघरि मुखमा खस्ने केशलाई सम्याएर ।
प्रश्न– नगरपालिकाभित्र सडकबत्ती प्रायः निभेका हुन्छन् किन ?
उत्तर– तस्करी, चोरी र अन्य अपराध गर्ने तथा सडक छेउमा शौच (दिसापिसाब) गर्ने नागरिकहरूलाई सजिलो होस भनेर ।
प्रश्न– सम्पादक कसलाई भन्छन् ?
उत्तर– जसले राम्ररी पाद्न सक्छ (अधोवायु त्याग्न सक्छ) त्यस्तोलाई सम्पादक भन्छन् ।
प्रश्न– एकातिर नोटको बिटो र अर्कोतिर पेस्तोल राखेर बस्ने यो कुन डाकुको तस्विर हो ?
उत्तर– डाकुको होइन, नुनावी उम्मेद्वारको तस्विर हो ।
प्रश्न– चलन हराउँदै गएको चुन्नीले छोप्ने कुरो नछोपेर घाँटीमा किन बेरेको होला ?
उत्तर– मौका मिले ओछ्याउन काम लाग्छ भनेर राखेको हो ।
प्रश्न– भोजभतेर र पार्टीमा ठूला हाकिम र नेता किा थोरै खान्छन् ?
उत्तर– किनभने घूस खाँदा खाँदा उनीहरूको भोक मरिसकेको हुन्छ, अर्थोक क्यै पनि उनीहरूलाई रुच्दैन ।
प्रश्न– केटाकेटलिाई घरबाट लैजाने, आफूखुशी आमाबाबुसँग पैसा असुल गर्ने र पछि केटाकेटी छाड्नेलाई अपहरणकारी किन नभन्ने ?
उत्तर– भन्नु हुन्न, किन भने उनीहरू बोर्डिङ स्कुलका प्रिन्सीपल हुन् ।
प्रश्न– कसैकसैले लामखुट्टेलाई धर्मात्मा किन भन्छन् ?
उत्तर– किनभने लामखुट्टेले पहिले तपाइँको प्राथृना गर्छ अनि मात्र तपाइँको सिकार गर्छ ।
प्रश्न– जीवनबीमा भनेको के हो ?
उत्तर– जीवनबीमा यौटा यस्तो सम्झौता हो, जसले तपाइँलाई जीवनभरि गरिब बनाएर राख्छ र मर्ने बेलामा धनी भएको आभास गराउँछ ।
प्रश्न– त्यस्तो को होला जो ज्ञानले भरिएको छ, तर क्यै पनि जान्दैन ?
उत्तर– पुस्तक राख्ने आलमारी ।
प्रश्न– केटाकेटीको परिभाषा के हो ?
उत्तर– केटाकेटी ती हुन्, जसलाई ती कामहरू गर्न दिइन्न, जुन काम तिनका अभिभावकले त्यो उमेरमा खूब रमाएर गर्थे ।
प्रश्न– केटाकेटीले गर्दा नै घर उज्यालो हुन्छ भन्छन् नि ?
उत्तर– एकदमै सत्य कुरा हो, किनभने केटाकेटीहरू बत्तीको स्वीच अन गर्छन् तर स्वीच अफ कहिल्यै गर्दैनन् । घर हरदम उज्यालो ।
प्रश्न– यो फटाहा युगमा साँचो बोल्ने पनि कोही होला र ?
उत्तर– किन नहुनु ! प्रायः केटाकेटी र जाँड खाएको मान्छेले साँचै बोल्छन् ।
‘प्रश्न सोझा ! उत्तर बाउँठा’ २०६३ बाट