नेपाली हास्यव्यङ्ग्य अनलाइन पत्रिका

उहाँ भन्नुहुन्थ्यो म मात्रै खटेको
नखाई नलाई सधैँ नै डटेको
जहाँ जेसुकै होस् उहाँ नै अगाडि
अहो ! धन्य चोला म आफू अनाडी ।।

सधैँ एक चिन्ता उहाँको मुहार
कहाँ को लडाई थुनूँ मुख्य द्वार
नआऊन् अरू बन्द ढोका सुटुक्क
उहाकै छ चिन्ता सबै ठाउँ ढुक्क ।।

कहाँ हुन्छ खाली त्यहीँ छिन्न कुर्सी
उहाँकै छ चासो अरू काम बिर्सी
कि पेसा कि पार्टी कि नाता छ चाङ
जहाँ ठिक्क हुन्छन् तिनै छन् भर्याङ ।।

कतै खर्च लाग्ने भए होस गुम्छ
निकै सोर्स लाग्ने भए जोस छुन्छ
गमक्कै छ चाला निराला उठान
उहाँकै सधैँ खट्न सक्ने बयान ।।

अरू मूर्ख हुन् स्वार्थका टाकुरा हुन्
नखट्ने र अल्छी कुराका छुरा हुन्
कुनै मार्गमा हिँड्न सक्दै नसक्ने
अरू ढुल्मुले हुन् उहाँ नै त सक्ने ।।

बिगारे अरूले सपारे उहाँले
बिना कामको याम कस्तो मजाले
अहो ! भाग्यमानी उहाँ मात्र एक
म आफू अनाडी उहाँमै विवेक ।।

काठमाडौं