नेपाली हास्यव्यङ्ग्य अनलाइन पत्रिका

१.मृत्युु
भ्रष्टाचारको दलदलमा अनेकौं भासहरू छन्
नेतृत्वको वाणीमा गन्हाएका सासहरू छन्
देशै चिहान बनेपछि मृत्यु सस्तो हुँदो रै’छ
आज हिमाल, पहाड तराई जताततै लासहरू छन् ।

२. हल्लाको पिरामिड
एउटा भन्छ –‘देश विदेशीको अखडा बन्दै छ’
अर्को भन्छ –‘देश टे«न्च र एम्बुसको बङ्कर हुँदैछ’
हल्लैहल्लाको पिरामिडभित्र विना ग्यारेन्टीको
प्रजातन्त्र खासाको सामान बन्दैछ ।

३. आँखाको इसारा
आँखाले आँखालाई आँखाको इसारा छ,
भाकाले भाकालाई भाकाको पुकारा छ,
वियोग नै प्रेमको उत्कर्ष रहेछ कि कसो ?
मिलनको चाह नै हृदयको सहारा छ ।

४. सस्तो मृत्यु
प्रण गरेपछि बाग्मतीमा अब नदी पसेको छ
होश खुलेपछि अब तन्त्रमा माया बसेको छ,
मृत्यु दस रुपैयाँ धानीभन्दा सस्तियो यहाँ
आफन्तीहरूको आँखाबाट पानीजस्तै आँसु खसेको छ ।

मन्थली, रामेछाप