नेपाली हास्यव्यङ्ग्य अनलाइन पत्रिका

मेरो बुढो घरका झ्याल ढोका लच्किएका छन्
बाहिरको प्रकाश भित्र छिर्नबाट
अब यिनले रोक्न सक्दैनन्
घरभित्र प्रकाश बढेको छ,
मेरो बुढो घरका झयाल ढोका लच्किएका छन् ।

मेरो बुढो घरका झ्याल ढोका लच्किएका छन्,
ठुलो आकाशको स्वच्छ हावा भित्र छिर्नबाट
अब यिनले रोक्न सक्दैनन्
घरभित्र प्रदूषण घटेको छ,
मेरो बुढो घरका झ्याल ढोका लच्किएकाछन् ।

मेरो घरसँगै म पनि बुढो भएको छु,
मेरा तन मन लच्किएका छन्
तन बाहिरको शुद्धता र मन बाहिरको प्रकाश
भित्र छिर्नबाट अब यिनले रोक्न सक्दैनन्
तनभित्र प्रकाश बढे्को छ
मनभित्र प्रदूषण घटेको छ
मेरो बुढो घरका झ्याल ढोकासँगै
मेरा तन मन लच्किएका छन् ।

हो, कुरो नबुझ्ने अव्यवहारिक र जिद्दी भएको छु म
म सुहाउँदा विशेषण अरु पनि छन्
सत्य यत्ति हो,
मेरो घरसँगै म पनि बुढो भएको छु,
मेरा तन मन लच्किएका छन् ।
तनभित्र प्रकाश बढेको छ
मनभित्र प्रदूषण घटेको छ
मेरो बुढो घरका झ्याल ढोकासँगै
मेरा तन मन लच्किएका छन् ।

बत्तिसपुतली, काठमाडौं