जीत कार्कीउल्टै उल्टो
कि मेरो घाम नै उस्तो- पुजेको धाम नै उस्तो दियो धोका उज्यालोले ! भयो उत्साह नै उल्टो !
धरा उल्टो, नदी उल्टो- झरी-वर्षा झनै उल्टो
जरा उल्टो, मुना उल्टो वितृष्णाको वनै उल्टो !
सधैं आस्था उमार्नेले- स्वयम् आराध्य बन्नेले
तुवाँलो बोक्छ आँखामा- छ मान्छेको मनै उल्टो !
इसारामै सधैं नाचें र ऐले ‘बिग्रिइस् !’ भन्छौ
कि मेरो आँगनै टेढो- कि तिम्रो ताल नै उल्टो !
कसैको देहमा आगो- कतै छन् मस्त मेलामा
कि यो संस्कार नै उस्तो- कि यो संसार नै उल्टो !
कि मेरो घाम नै उस्तो- पुजेको धाम नै उस्तो
दियो धोका उज्यालोले ! भयो उत्साह नै उल्टो !
०००
चरिकोट, दोलखा
