नेपाली हास्यव्यङ्ग्य अनलाइन पत्रिका

सयौं चोट खाइस्-झुकिस् वार-वार
कतिञ्जेल झुक्छस् ? बता ए निधार !

यहाँ शक्तिशाली भिनाकै सखा छन्
कहालिन्छु देख्दा दिदीको सिँगार !

अहो ! भाग्य कस्तो दिइस् ए विधाता ?
उता लुछ्छ वैरी – यता यो प्रहार !

यहाँ अन्नपानी असाध्यै महङ्गो
कठै ! जिन्दगीको छ सस्तो बजार !

भयो, बन्द होस् आँसुको हाट लौ न !
कहाँ सुन्छ मान्छे दुखीको पुकार ?

यहाँ “म्याउ” मा फेरिए “सिंहनाद”
कठै ! देश हाँक्ने भए यी हुँडार !

कुलक्ष्मी कि लक्ष्मी दुरुस्तै छ खाता
म हेर्दैछु मालिक् ! नगर्नुस् हतार !

०००
५ मङ्सिर २०७९
चरिकोट, दोलखा