नेपाली हास्यव्यङ्ग्य अनलाइन पत्रिका

एक

बाटो पहिल्यै किन्छु भन्थ्यौ पाइला किनेर देखाऊ
म मुटु ओछ्याउँछु सक्छौ तिमी हिंडेर देखाऊ
पर्ख न ! थोरै रगत झिक्छु मेरो पनि मिसाउँछु
कुन तिम्रो कुन मेरो लौ त चिनेर देखाऊ ।

दुई
घर हराउन सक्छ अनि गोठ हराउन सक्छ
तिम्रो मेरो मायाको बोट हराउन सक्छ
तिमी खुकुरी भई म अचानो हुँदा के भो ?
एक दिन मेरै पनि चोट हराउन सक्छ ।

तीन
कोहि त लुकिलुकि हान्ने भएनन् भने
हो, देखिदेखी रिस मान्ने भएनन् भने
जिन्दगी कसरी अगाडि बढ्छ र प्रिय ?
दुई चार जना खुट्टा तान्ने भएनन् भने ।

चार
मरुभूमिको दुनियाँलाई सहर बनाइदिन्छु
बर्सौंको मेहेनत एक प्रहर बनाइदिन्छु
आगोको इँट माथि परालको छानो राखी
हेर्नुस् त्यस्ता समुन्द्रमा घर बनाइदिन्छु ।

मकवानपुर, हेटौडा