नेपाली हास्यव्यङ्ग्य अनलाइन पत्रिका

प्रेम घिमिरे “अग्निकवच” :

मुक्तक १
रातभरि रगत बग्यो, तब बिहानी जन्मियो,
जनताको मुटुभित्र, नयाँ कहानी जन्मियो।
सिंहासनभन्दा ठूलो, शक्ति जनता हुन् भन्ने,
गणतन्त्रको अमृत दिने, एक मुहानी जन्मियो।

मुक्तक २
शहीदका सपना अझै पूरा हुन बाँकी छ,
झुपडीले महलले झैँ आकाश छुन बाँकी छ।
गणतन्त्र केवल दिवस होइन सम्झना हो,
न्याय, समानताले अझै समाज धुन बाँकी छ।

मुक्तक ३
हिमाल झैँ अडिग बनौँ, आँधीसँग भिड्नु पर्छ ,
देश बेच्ने स्वार्थीलाई, पाता कसी गिड्नु पर्छ ।
जनताको अधिकारमा, खेल्न खोज्ने पातकीलाई,
गणतन्त्रको ज्वाला बाल्न, सधैँ अघि बढ्नु पर्छ ।

मुक्तक ४
रगतले सिँचेको यो, परिवर्तन निशान हो,
जनताको बलिदानले, लेखिएको अभियान हो।
नेपालीको शिर कहिल्यै, झुक्न नदिने प्रण गरौँ
गणतन्त्र हाम्रो गौरव हो, हाम्रो स्वाभिमान हो।

०००