नेपाली हास्यव्यङ्ग्य अनलाइन पत्रिका

चितवन, २०८० वैशाख २ । साहित्यलाई बन्द कोठा, भव्य सभा, पार्टी प्यालेस र सामाजिक सञ्जालको कठघराबाट बाहिर ल्याएर आम सर्वसाधारण जनताहरूसँग प्रत्यक्ष जोडिएर दूर दराजका आम मानिसहरूलाई साहित्यसँग प्रत्यक्ष जोड्ने र सामाजिक जनचेतनामा अभिवृद्धि गर्ने मुख्य उद्देश्य राखेको छ लघुकथा अभियान ।

साहित्यको एउटा गहन र सूक्ष्म विधा लघुकथा मार्फत सुन्ने र सुनाउने लघुकथा अभियान अन्तर्गत आज चितवन जिल्लाको सुदूर पूर्व राप्ती न.पा.-१० स्वामीटार स्थित राष्ट्रिय माध्यमिक विद्यालय परिसर भित्र शोभा चेपाङ र कमला कुमारी सुनुवारज्यूको हातबाट चुवा फूलको माला अर्पण गर्दै अभियानको दोस्रो शृङ्खला सम्पन्न गरियो ।

प्रधान अध्यापक आसमान तामाङ राप्ती नगरपालिका वडा न. १० का वडा अध्यक्ष तेजबहादुर तामाङको विशिष्ट अतिथि रहेको उक्त कार्यक्रममा स्थानीय बासिन्दाहरूको उत्साहजनक सहभागिता रहेको थियो ।

नमस्ते आधुनिक लघुकथा मञ्च चितवनबाट अभियन्ता मिठु डल्लाकोटी, घनश्याम डल्लाकोटी हुनुहुन्थ्यो र लघुकथा चौतारी मकवानपुरका अभियन्ताहरू किशन पौडेल, श्यामप्रसाद श्रेष्ठ, समीर पाख्रिन, तोयनाथ सुवेदी, विष्णुप्रसाद गौतम र भरतपुरबाट प्रभादेवी पौडेलले आआफ्नो लघुकथाहरू उपस्थित आम सर्वसाधारण पाठकहरू माझ वाचन गरेर सुनाउनु भएको थियो ।

साथै विभिन्न लघुकथा कृतिहरू स्थानीय स्वामिटार र खहरेका विभिन्न राष्ट्रिय आधारभूत विद्यालयका प्रधान अध्यापक श्रीआसमान तामाङ, श्रीसक्तबहादुर बि.क. श्रीदसरथ तामाङ, श्रीतामु गौरी, स्वास्थ्य चौकी इन्चार्ज श्रीकुमार सापकोटालाई हस्तान्तरण गर्नुभएको थियो ।

किशन पौडेलले लघुकथाको बारेमा संक्षिप्त जानकारी दिनुभएको थियो भने कार्यक्रमको प्रमुख अतिथि लघुकथाकार एवम् समीक्षक मनिषकुमार शर्मा (काठमाडौँबाट) हुनुहुन्थ्यो ।

कार्यक्रमको संयोजक नमस्ते आधुनिक लघुकथा मञ्च चितवनका कृष्णजी शर्मा र लघुकथा चौतारी मकवानपुरको तर्फबाट किशन पौडेलले गर्नुभएको थियो भने कार्यक्रम सञ्चालन मिठु डल्लाकोटीज्यूले गर्नुभएको थियो ।

०००