नेपाली हास्यव्यङ्ग्य अनलाइन पत्रिका

कविराज घिमिरे :

चुरोट खाई गरी ख्वाक्क ख्वाक्क
पारेर बस्छन् सबनिम्ति वाक्क
बेकार हिँड्छन् किन ती जिएर
म हुन्न पाको मदिरा पिएर ।।१

पाएन माया बिचरो छ नाति
बुझ्दैन बाजे किन हो पनाति
लुकेर पाकोपन हुन्छ ठाँडो
म हुन्न त्यस्तो अब वृद्ध घाँडो ।।२

छ नातिनीको कति चाह बाजे
बाङ्गो छ बाजे नबनेर साझे
वास्ता नगर्दै अझ बन्छ काँचो
यस्तो भई व्यर्थ म हुन्न पाको ।।३

छोरा र छोरीसँग द्रोह गर्छ
न मिल्छ पत्नीसँग भोग गर्छ
छिमेक आफ्नो पर छैन नेर
यस्तो बने हुन्न म वृद्ध हेर ।।४

न राष्ट्रको लिन्छ विशेष चिन्ता
अज्ञान भाषाप्रति हुन्छ कुण्ठा
छ स्वार्थ मात्रै दिलमा अँध्यारो
यस्तो हुँदा वृद्ध म हुन्न प्यारो ।।५

छ भ्रष्टको सङ्गत लोभपाप
स्वदेशनिम्ति अति गर्छ घात
चाहिन्न यस्तो अब ता बुढ्यौली
भो भो छिटो जा तँ उतै बुढ्यौली ।।६

०००
भक्तपुर