नेपाली हास्यव्यङ्ग्य अनलाइन पत्रिका

कामरेड वैभवलाई पार्टीकै एकथरि साथीहरुले आजभोलि कन्डापछाडि लुम्री कामरेडको उपाधि दिएका छन् । लुम्रो कामरेड भन्दाभन्दै लुम्रीमा झारेका छन् । लुम्रो पुलिङ्गी शब्द, लुम्री स्त्रीलिङ्गी शब्द । पुरुषलाई शानशौकात, ओज र बलको प्रतीक ठान्ने समाज छ । अनि स्त्रीलाई चैँ अवला, निरीह र शक्तिहीनतामा तौलिन्छ ।

हिजोसम्म ऊ कामरेड वैभवको रुपमा महिमामण्डित थियो । त्यागको, बलिदानको, समर्पणको मिहेनत र निस्वार्थ भावमा ऊ धनी थियो । क्रान्तिको लागि यी कुराको वैभव उसमा लवालव भरिएको थियो । हिजो डराउने लुम्राहरु अहिले वैभवशाली भए । कठिन अवस्थाको कामरेड वैभव अहिले कामरेड लुम्रीमा रुपान्तरण भयो ।

यसका धेरै कारण छन् । उसले अहिले पनि कार चढेर हिड्ँन सकेको छैन, लुखुरलुखुर खुट्टाले नै जमिन नापिरहेको छ । सहरमा आलिशान हवेली उभ्याउन सकेन । गाउँकै झुप्रीमा ओता लागिरहेको छ । स्वास्नी छोराछोरीलाई सहरको रंगिन जीवनमा मोज दिलाउन सकेन । पत्नी अझै पनि वनपात गरिरहेकी छिन् । प्रशस्त पैसा कमाउन सकेन । तस्कर र माफियासँग साँठगाँठ गर्न सकेन । उसका समवयी भित्रहरुले धेरै कुरा भ्याइसक्ता पनि ऊ त्यस मामिलामा नितान्त लुम्रो देखियो । त्यसैले उसलाई देख्ने वित्तिकै उसकै हिजोका हितैषीहरु लुम्री कामरेड भनी फिस्स हाँस्छन् ।

लुम्री कामरेड भने अवशादको शिकार बनी दिनदिनै गल्दैगएको छ । दिनरात एक झोक्राउने विमारले छोएको छ । न खान मन लाग्छ । न बोल्न मन लाग्छ । न काम गर्न मन लाग्छ । केही गर्न मन लाग्दैन । ऊ दिनदिनै शिथिल, क्लान्त र विषादको भावमा डुब्दैगएको छ ।

हिजोका लुम्राहरू आज भैभवशाली बनेका छन् । आजका कामरेड वैभवहरूले कामरेड लुम्रीको हालत देखेर घोषणा गरे- ‘अब कामरेड लुम्रीले केही दिनमा आत्महत्या गर्नेछ ।’

०००

उदयपुर