नेपाली हास्यव्यङ्ग्य अनलाइन पत्रिका

एउटा भक्तले मन्दिरमा गएर मुटु दह्रो बनाउँदै भगवान समक्ष आफ्नो गुनासो पोख्दै भन्यो “भगवान् ! कलिको उत्पातले पराकाष्ठा नाघ्यो । अन्याय, अत्याचार, भ्रष्टाचार र अनैतिकता चरमचुलीमा पुग्यो । हत्या हिंसा र बलात्कारका घटनाहरू तिव्र गतिमा बढिरहेको छ । हरेक क्षेत्रमा पापीहरूको वाहुल्यता बढ्दै गएको देखिन्छ । हुँदाहुँदा राजनीति, साहित्य, कला, खेलकुद, समाजसेवा, शिक्षा, स्वास्थ्य जस्ता पवित्र संस्था र तिनमा संलग्न व्यक्तिहरू समेत लोभीपापी देखिन थालेका छन् प्रभु ।

यतिमात्र होइन, यातायात क्षेत्रबाट प्रवेश गरेको सिन्डिकेट व्यवस्था उल्लेखित क्षेत्रमा पनि उत्तिकै देखिन थालेको छ । एकपटक सिंहदरबार प्रवेश गरेको नेता कहिले पनि घर फर्किन मान्दैन । त्यो पनि चित्त बुझाएकै थियौं । हुँदाहुँदै अब त उनैका छोरी, बुहारी, श्रीमती, भाइ, भतिजा र नातागोता लाई मात्र सिंहदरबार पठाउने काइते खेल सुरु हुँदैछ प्रभु । सहन सक्ने जति त सहेकै हो, सहनुको पनि हद हुनेरहेछ । अब हामीमा सहने शक्ति बाँकी छैन । अति भएपछि यो बिन्ती बिसाउँदै छु भगवान् । यहाँको विकृति र विसंगतिको अन्त्य हुने कुनै लक्षण देखिएन । न त हामीबाट नै यसको समाधान हुनसक्छ । त्यसैले भगवान्, अब छिट्टै यस धर्तीमा अवतरण गरेर धर्तीलाई लोभी पापीहरूको चङ्गुलबाट मुक्त गरिदिनु पर्यो !”

भगवानले भन्नु भयो- “वत्स, सारा विकृतिका विरुद्ध धर्तीमा अवतरणका लागि मलाई अनुरोध गर्यौ, विकृति बढेको स्विकार्न सक्ने चेत आएकोमा धन्यवाद । तर दुःखका साथ भन्दैछु, यो तिम्रो माग तत्काल मबाट पूरा हुन सक्दैन ।”

“किन प्रभु ?” भक्तले पुनः आफ्नो जिज्ञासा प्रकट गर्यो । भगवानले भन्नु भयो “प्रिय भक्त, अहिले धर्तीमा महाभारत काल र रामायण काल जस्तो अवस्था छैन । म कुन अवतारमा अवतरण गरौं ? कृष्ण अवतार लिने हो भने त्यसबेला एउटा मात्र कंश थियो । शकुनी एउटै थियो । तिनको अन्त्य गर्न खासै कठिनाइ थिएन । अचेल अधिकांश मान्छेभित्र कंशको रूप देखिन्छ । अनगिन्ती मान्छेहरू शकुनी बनेका छन् । त्यसैले तिमीले सोचेजस्तो त्यति सहज छैन ।

तिम्रो समाजले पाण्डवहरू कि कुल वहु द्रौपदीमाथि औंला उठाउन सक्छ । एकजना महिलाले पाँच पति राख्ने परम्परालाई तिमीहरूले फेरवदल गरि विलकुलै विपरीत बनाइ दियौ । बनवासका लागि जङ्गल जाऔँ आतङ्ककारी भन्छौ । एकैछिन द्यूतक्रिडामा रमाउने हो भने, तिमीहरू जुवाडे सम्झन्छौ । अझै प्रहरी प्रशासनले समेत कार्वाही गर्नसक्छ ।
राम अवतार लिने हो भने ठाडै सितालाई अन्याय भयो भन्दै मै माथि कार्वाहीको आवाज उठाउन सक्छौ । सीताको अग्नि परीक्षा लिने वातावरण पटक्कै छैन । सुन्दैछु, राजधानी अयोध्या समेत विवादमा तानिएको छ । मैंले कहाँ राजधानी बनाएर राज्य सञ्चालन गर्नु ?

कैकेयी विरुद्ध आमा समुहको अभुतपूर्व जुलुस निस्कन सक्छ । यदि यस्तो भइदियो भने पुत्र प्रति माता पिताको विश्वास रहँदैन । नाता सम्बन्ध विचको मान सम्मानमा भुइँचालो जानसक्छ । पृथ्वीमा एक्लै जन्म लिने कुरा असम्भव छ । मैले राम्रो सँग बुझेको छु, त्यस समयका सबै पात्रहरूले निर्बाह गर्नु पर्ने भूमिकामा अवश्य पनि अवरोध आउन सक्छ । खै किन हो अचेल मान्छेहरू छोइनसक्नु भएका छन् । तिमीलाई पनि थाहा छ, कति मान्छेहरू स्वयं भगवान हुँ भनेझैं गर्छन् । कतिले आफैं शासक भएको व्यवहार प्रदर्शन गर्न सक्छन् । त्यसबेला र वर्तमान परिस्थितिमा आमूल परिवर्तन आएको छ । यति मात्र होइन, उहिले र अहिले अनगिन्ती कुराहरूमा मेल खाँदैनन् । अब हामी मानव कोखमा जन्म लिएर अवतरण गर्न सक्ने वातावरण छँदै छैन । न मान्छेहरूले हाम्रो अवतारण नै गर्न सक्छन् ? त्यसैले असम्भव माग नगर । यो विकृति निवारणको एउटै मात्र उपाय तिमीहरू आफैंसँग छ वत्स ।”

“के उपाय छ बताइदिनु होला भगवान ?” उसले अन्तिम पटक भगवानसँग बिन्ती बिसायो ।
भगवानले भन्नु भयो- “तिमीहरू आफैं सुध्रनु पर्छ । भावी पुस्तालाई अनिवार्य नैतिक शिक्षा पढाउनु पर्छ । अब सधै हाम्रो भर गरेर बस्ने बानी त्यागीदेऊ भक्त ।”

भगवानको कुराले निराश हुँदै भक्तले लामो सास फेर्यो । उसले मनमनै भन्यो आखिरमा मान्छे कहिले र कहाँनेर चुक्यो होला ?

०००
चितवन ।