अब त सर्दिन…
यताका पनि सर भन्छन्, नेपालकाहरू पनि सर भन्छन्, फेसबुकमा पनि सर भन्छन्, मसेन्जरमा पनि सर भन्छन् । भेट हुँदा पनि सर भन्छन् । पहिले पहिले बसमा बस्दा पनि सर भन्थे, रेलमा चढ्यो हिन्दीमा सर भन्थे ।
प्रमोद अमात्य
‘अमात्य सर’
‘प्रमोद सर’
तपाईं सर भन्नु हुन्छ, वहाँ सर भन्नु हुन्छ ।
भन्नुस् त अब कता सरौँ ? नेपालबाट केही समय जर्मनी, अनि त्यहाँबाट पनि सर्दा सर्दा अमेरिका सरिसकेँ, अब कता सरौँ ? अमेरिकाको डिसी एरिया, भर्जिनिया बसेँ सर सर भने, क्यालिफोर्निया सरेँ ।
यताका पनि सर भन्छन्, नेपालकाहरू पनि सर भन्छन्, फेसबुकमा पनि सर भन्छन्, मसेन्जरमा पनि सर भन्छन् । भेट हुँदा पनि सर भन्छन् । पहिले पहिले बसमा बस्दा पनि सर भन्थे, रेलमा चढ्यो हिन्दीमा सर भन्थे । अब यताउता सर्ने मन छैन, रहर छैन । अब नगर्ने सर्ने काम, त्यसैले कसैले पनि मलाई सर, सर नभनौँ है साथी हो !
भन्नैपरे, सर हैन, जी थपेर प्रमोदजी, अमात्यजी वा प्रमोद मात्र भने पनि मनग्ये पुग्छ । अनि, प्रमोद मामा, प्रमोद काका, प्रमोद बा अथवा ठूल्बा भन्दा पनि भो । नत्र दाई भन्दा पनि भो, भाइ भन्दा पनि भो- प्रमोद दाइ, प्रमोद भाइ । साथी भन्दा हुन्छ, मित्र पनि मीठो सुनिन्छ, बन्धु पनि त बढिया हुन्छ ।
पासा त झन् खास्सा हुन्छ । तर, तर, बाजे, हजूर र हजूरबुबा भन्न भन्दा पहिले चैं राम्ररी सोच्नुहोला । नत्र, नत्र बरु ‘सर’ नै भन्नुस्, यताउता कतै मिलाएर सरौँला, केही नलागे ! मखुला पासा ?
०००
अमेरिका